काठमाडौं । नेकपा एमालेका उपाध्यक्ष, संविधानसभाका अध्यक्ष तथा पूर्वसभामुख सुवासचन्द्र नेम्वाङको गएराति अचानक निधन भयो । सामाजिक सञ्जाल तथा सामाचारहरुमा हृयदघातका कारण निधन भएको भनिएको छ ।
खासमा नेम्वाङलाई सोमबार बिहानैदेखि ज्वरो आएको बुझिएको छ । मंगलबार विहान बसेको मन्त्रिपरिषद्को आकस्मिक बैठकको निर्णय बारे जानकारी दिने क्रममा पर्यटन मन्त्री सुदन किराँतीले नेम्वाङलाई ज्वरो आएको जानकारी पाइएको बताउनुभयो । रुघाखोकी तथा ज्वरो आएपछि सोमबार दिनभर घरमै आराम गरेर बस्नु भएको नेम्वाङका स्वकीय सचिव कृष्णप्रसाद काफ्लेले जानकारी दिनु भएको छ । आइतबार धरान पुगेर फर्किएका नेम्वाङलाई सोमबार बिहानैदेखि ज्वरो आएको थियो । घरमै आएका डाक्टरले साँझ नेम्वाङको स्वास्थ्य परीक्षण गरेका थिए । त्यतिबेला उहाँलाई १०२ डिग्री ज्वरो आएको थियो ।
पारिवारिक स्रोतकाअनुसार डाक्टरले स्वास्थ्य परीक्षण गरेपछि अस्पताल जानुपर्दैन घरमै आराम गर्दा हुन्छ भनेका थिए । बेलुका सुप खाएर सुत्नु भएको उहाँ राति करिब १ बजेतिर घरको शौचालयमा बेहोस भेटिएपछि शिक्षण अस्पताल महाराजगञ्ज पुर्याइएको थियो ।
उहाँलाई बालुवाटारस्थित निवासबाट त्रिवि शिक्षण अस्पताल महाराजगञ्जमा पुर्याउँदा राति १ः५० बजेको थियो । त्रिवि शिक्षण अस्पतालको कागजपत्रमा नेम्वाङलाई १ः५० बजे अस्पताल ल्याइपुर्याएको उल्लेख छ । अस्पताल पुर्याएलगत्तै चिकित्सकहरुले नाडी, मुटुको धडकन र श्वासप्रश्वासको अवस्था चेक गरेका थिए । तर ती कुनै पनि नचलेको पाइएपछि मृत घोषणा गरेका थिए ।
नेता नेम्वाङ बालुवाटारस्थित निवासमा हुनुहुन्थ्यो । उहाँका दुवै छोरा देश बाहिर छन् । छोराहरु आइपुगेपछि बुधबार वा विहीबार मात्र नेम्वाङको अन्त्येष्टि गरिने बताइएको छ । आज उहाँको शव एमाले पार्टी कार्यालय च्यासलमा श्रद्धाञ्जलीका लागि राखिएको छ । यता नेपाल सरकारले पनि नेम्वाङको राजकीय सम्मानका साथ अन्त्येष्टि गर्ने निर्णय गरेको छ ।