विराटनगर । नेकपा एमाले कोशी प्रदेशको नयाँ नेतृत्व चयनका लागि भएको निर्वाचनको मतगणना सुरु भएको छ । मतदान सम्पन्न भएको १२ घण्टा पछिदेखि मतगणना सुरु भएको हो । दिउँसो २ बजेदेखि नै मतगणना सुरु हुने भनिए पनि साढे ५ बजेदेखि मात्र सुरु भएको छ ।
मतगणनास्थलमा बाक्लो संख्यामा सुरक्षाकर्मी परिचालन गरिएको छ भने ७ ठाउँमा मतगणना गरिएको छ । सुरुमा पदाधिकारीको मात्र गणना गरिने भएकाले पदाधिकारीको मतपरिणाम चाँडै घोषणा हुने देखिएको छ । पदाधिकारीको सकेर मात्र सदस्यहरुको मतगणना हुने बताइएको छ ।
निर्वाचनमा जम्मा ९ सय ७७ जना प्रतिनिधिले मतदान गरेका छन् । कुल ९ सय ९७ प्रतिनिधिमध्ये २० जना अनुपस्थित भएका छन् । गएराति १० बजेदेखि सुरु भएको मतदान विहान ५ बजजेतिर मात्र सकिएको थियो ।
अधिवेशनले २ सय १५ सदस्यीय प्रदेश कमिटीमा एक अध्यक्ष, एक उपाध्यक्ष, एक सचिव र दुई उपसचिवसहितको पदाधिकारी र सदस्यहरू निर्वाचित गर्नेछ । प्रदेश कमिटी सदस्य पदमा भने केही जिल्लामा निर्विरोध भएका छन् ।
एमालेको कोशी प्रदेश कमिटीको अध्यक्षमा मोरङका घनश्याम खतिवडा र विनोद ढकाल उम्मेदवार हुनुहुन्छ । यता उपाध्यक्षमा भने धनुकटाका टीकाराम चेम्जोङ निर्विरोध निर्वाचित हुनु भएको छ ।
सचिवमा उदयपुरका शैलेश लामा र पाँचथरका राजकुमार भण्डारी उम्मेदवार हुनुहुन्छ । यसैगरि २ जना उपसचिवका लागि ३ जनाको उम्मेदवारी परेको छ । जसमा खोटाङका देवान राई, मोरङका खेम नेपाली र झापाकी जलवर्षा राजवंशी उम्मेदवार छन् ।